Um Skógá
Vatnasvæði Skógár samanstendur af Kvernu og Skógá sem rennur um 36 km leið til sjávar. Yfir 80 fossar eru á öllu vatnasvæðinu en enginn þeirra er þó fiskgengur. Svæðið sem veitt er í samanstendur af 7 kílómetra kafla Skógár og yfir 2 kílómetra kafla Kvernu. Svæðin eru 6 og eru um 90 hyljir stórir sem smáir sem menn hafa um að velja. Stangirnar eru fjórar sem deila þessum 90 hyljum með sér.
Skógá er lax- og silungsveiðiá og unnið hefur verið að því að bæta hylji með grjóti og búa til búsvæði. Fiskrækt er stór hluti þess að veiðin hefur vaxið og ástæða þess að veiðin helst nokkuð jöfn á milli ára, en á svæði er sleppt miklu magni seiða og smáfiska af öllum tegundum. Besta silungsveiðiárið var 2001 og gaf 2700 fiska, en 2008 var mjög gott laxveiðiár og gaf 1540 laxa og mikill fiskur var á ferðinni þegar klakveiðin hófst. Svæðið er afar fjölskylduvænt enda frekar gott aðgengi að.
Svæðið samanstendur af straumhörðum hyljum, holum, lygnum, breiðum, bakkahyljum og fossum. Skógá er í 150 kílómetra farlægð frá Reykjavík og er nokkurn veginn mitt á milli Vík í Mýrdal og Hvolsvallar. Veiðihúsið við Skógafoss er ekki með þjónustu og verða veiðimenn því að sjá um sig sjálfir. Veiðimálastofnun er með síritamælingar í ánni sem skráir hitastig árinnar með ákveðnu millibili. Veiðimálastjóri fylgist skilum örmerkja og Laxfiskar ehf sjá um örmerkingar seiðanna sem sleppt er á svæðið.
Kverná
Gil Kvernu opnast u.þ.b. 500 m austan Byggðasafnsins að Skógum. Þessi bergvatnsá kemur upp á Skógaheiði og rennur til Skógár. Eldra nafn hennar er Kvarnarhólsá. Frá gilkjaftinum sést til hins 40 m háa Kvernufoss og auðvelt er að ganga upp að honum. Bak við fossinn er bergið laust í sér og hált á köflum, þannig að best er að fara með aðgát.
